បាត់បង់ជីវិតពីរនាក់ដោយសារគ្រោះថ្នាក់ចរាចរណ៍រវាងរថយន្តនិងម៉ូតូ
30-April-2016 | ដោយ មែន កំសត់
កំពត៖ ជីវិតមនុស្សពីរនាក់បានបាត់បង់ភ្លាមៗ បន្ទាប់ពីជួបហេតុការណ៍គ្រោះថ្នាក់ចរាចរណ៍ រវាងរថយន្ត និងម៉ូតូកាលពីយប់ថ្ងៃទី២៩ ខែមេសា ឆ្នាំ២០១៦ ស្ថិតនៅលើកំណាត់ផ្លូវជាតិលេខ៣ ក្នុងភូមិត្រសេកកោង ឃុំថ្មី ស្រុកទឹកឈូ ខេត្តកំពត។
ជនរងគ្រោះរួមមាន ម៉ៅ ម៉េត ភេទប្រុស អាយុ ៣២ឆ្នាំ និង ទូច ហៅ ង៉ែត ភេទប្រុស អាយុ ១៩ឆ្នាំ។ អ្នកទាំងពីរមានទីលំនៅភូមិអូរក្រួស ឃុំកណ្តោល ស្រុកទឹកឈូ ខេត្តកំពត។ ដោយស្រង់សម្តីពីអ្នករស់នៅក្បែរកន្លែងកើតហេតុមន្ត្រីនគរបាលចរាចរណ៍ ខេត្តកំពតបានរៀបរាប់ថានៅវេលាម៉ោងប្រហែល៩និង៣០នាទីយប់មានម៉ូតូ មួយគ្រឿងធ្វើដំណើរក្នុងទិសដៅពី លិចទៅកើត។ ខណៈនោះដែរស្រាប់តែមានរថយន្តមួយគ្រឿងអាចជាប្រភេទកូរ៉េបើកមកពីទិស ខាង កើតដោយល្បឿនយ៉ាងលឿនហើយលាន់ឮស្នូរបុកប៉ះគួរឱ្យព្រឺឆ្អឹងខ្នង។
ប្រភពដដែលបានបញ្ជាក់ថា ទោះជាបែបនេះ ក្តីរថយន្តនោះមិនបានបញ្ឈប់ទេដោយបន្ថែមល្បឿនបើកបរបន្តទៅមុខទៀត ពេលស្ថានភាពកំពុងស្ងប់ស្ងាត់។ មួយសន្ទុះក្រោយមកដោយសារមានអ្នកដំណើរមកដល់ទើបអ្នកជិតខាងហ៊ានរត់ឡើង សំដៅទៅកន្លែងកើតហេតុ ក៏ឃើញមនុស្សពីរនាក់ដេករដូករណែលខ្ទាតឆ្ងាយពីម៉ូតូរៀងៗខ្លួន។ ពេលគ្រប់គ្នាចូលទៅជួយលើកជនរងគ្រោះទើបដឹងថា អ្នកទាំងពីរបានស្លាប់ទៅហើយក៏ប្រញាប់ប្រញាល់រាយការណ៍ដល់សមត្ថកិច្ច ឱ្យបានដឹង។ មន្ត្រីនគរបាលចរាចរណ៍បានបញ្ជាក់ផងដែរថា ពេលនេះសមត្ថកិច្ចកំពុងតាមដានស្រាវជ្រាវកំណត់មុខសញ្ញារថយន្តបង្ក ដើម្បីតាមរកម្ចាស់ឱ្យ មកទួលខុសត្រូវតាមផ្លូវច្បាប់៕
ចំនួនអ្នកទស្សនា
- ថ្ងៃនេះ2301
- ម្សិលមិញ20231
- សប្តាហ៍នេះ81381
- ខែនេះ103261
- ឆ្នាំនេះ103261
- សរុប20545717